நூல் : வடலூர் வரலாறு (கற்காலம் முதல் தற்காலம் வரரை)
நூல்வகை : ஊர்வரலாறு.
நூலாசிரியர் : முனைவர் ஜெ.ஆர்.சிவராமகிருஷ்ணன்
பதிப்பகம் : வெர்சோ பேஜஸ் - பன்முகமேடை.
விலை : 200
நூலின் பக்கங்கள் : 160
"ஒரு நாட்டின் வரலாறு கிராமத்தில் இருந்தே துவங்குகிறது என்ற பொருண்மை வாதத்தின் அடிப்படையில் மேற்கத்திய வரலாற்றாளர்கள் ஊரக தொல்லியல் குறித்த ஆய்வில் அதிக கவனம் செலுத்தி வருகின்றனர். அரசு உருவாக்கத்தின் ஆணிவேர் தொல்குடி களிடமிருந்தே துவங்கப்படுவதை சங்க இலக்கியங்கள் ஊடாக அறியமுடிகிறது. அத்தொல்குடிகளின் வாழ்விடமே ஊர் உருவாக்கத்தின் திறவுகோலாகும். இந்நோக்குருவின் தாக்கத்தை வடலூர் வரலாற்றில் காணமுடியும். இந்நூல் வடலூரைச் சுற்றி நடைபெற்ற முந்தைய கால அகழாய்வுச் சான்றுகள், நேரடிக்கள ஆய்வில் திரட்டப்பட்ட விபரங்கள், கல்வெட்டுத் தரவுகள், புவிசார் தகவல்கள், சமகால இலக்கிய மற்றும் தனிமனித ஆவணக் குறிப்புகள் போன்றவற்றின் அடிப்படையில் கட்டமைக்கப் பட்டதாகும்.வடலூரை மையமாகக் கொண்டு மாவட்டத்தின் ஒட்டுமொத்த வரலாற்றுப் பின்புலத்தையும் வெளிப்படுத்தும் வகையில் இந்நூல் எழுதப்பட்டுள்ளது" என்பது இந்த நூலாசிரியர் சிவராமகிருஷ்ணன் அவர்களின் நூலாசிரியர் உரையாக இருக்கிறது.
இந்நூலுக்கு அணிந்துரை வழங்கியுள்ள குந்தவை நாச்சியார் அரசு மகளிர் கலைக் கல்லூரி தமிழ்த்துறைத் தலைவர் முனைவர் திராவிடமணி அவர்கள் வடலூரில் சைவம், வைணவம், சமணம், பௌத்தம், கிருத்துவம், இஸ்லாம் போன்ற மதங்களின் தாக்கம் பற்றியும், அம்மதங்கள் எப்படி மனிதத்தையும் நல்லிணக்கத்தையும் சிறப்பாக ஏற்படுத்தி வருகின்றன என்பதையும் இந்நூல் வரலாற்றுச் சான்றுகளின்படி விவாதிப்பது சிறப்பு. கள ஆய்வில் புதியதாக கண்டுபிடிக்கப்பட்ட புதிய சான்றுகள், முந்தைய அகழாய்வுச் சான்றுகள், இலக்கியம், கல்வெட்டுகள், நாணயங்கள், சிற்பங்கள், வெளிநாட்டினரின் குறிப்புகள் போன்ற தரவுகளைக் கொண்டு வடலூர் வரலாறு கட்டமைக்கப்பட்டதில் ஆய்வாளரின் பன்முகத்தன்மை வளரும் ஆய்வாளர்களுக்கு முன்மாதிரியாக விளங்குகிறது" என்று குறிப்பிட்டுள்ளார்.
இந்நூல் 9 இயல்களைக் கொண்டது. முதலாவது இயலில் முன்னுரையாக கட்டப்பட்டு இருக்கிறது. இதில் நிலவியல் அமைப்பு, வடலூர் அமைவிடம், வடலூர் பெயர் காரணம் ஆகியவை குறித்த முன்னோட்டம் பதிவு செய்யப்பட்டிருக்கிறது.
இரண்டாவது இயல் வரலாற்றுக்கு முற்பட்ட காலத்தை விளக்குகிறது. அதாவது கற்காலம், பழைய கற்காலம், புதிய கற்காலம், நுண்கற்காலம், வெண்கலக் காலம், பெருங்கற்காலம், முதுமக்கள் தாழி, வடலூரில் இரும்புக் காலப் பண்பாடு, இரும்புக் காலத்தைச் சார்ந்த பானை ஓடுகள், குறியீடுகள் போன்றவைகள் விளக்கப்பட்டுள்ளன.
பழைய கற்காலம் முதல் பழங்கற்காலம், இடைப் பழங்கற்காலம் கடைப் பழங்கற்காலம் என மூன்று பிரிவுகளைக் கொண்டதாகும். குறிப்பாக பழைய கற்காலம் கிமு இரண்டு லட்சம் முதல் கி-மு பத்தாயிரம் வரை தமிழகத்தில் நிலவியதாக தொல்லியல் ஆய்வாளர்கள் கூறுகின்றனர். மேலும் இக் காலத்தைச் சார்ந்த மக்கள் பயன்படுத்திய கற்கருவிகள் தமிழகத்தின் வடபகுதியில் உள்ள திருவள்ளூர், காஞ்சிபுரம், வேலூர், தருமபுரி, மற்றும் கடலூர் மாவட்டத்திற்கு தெற்கே உள்ள அரியலூர் போன்ற மாவட்டங்களில் கிடைக்கப்பெற்றுள்ளன. இதேபோன்று கடலூர் மாவட்டம் விருதாச்சலம் அருகே ஓடப்பன் குளம் சின்ன ஓடையில் பழங்கற்கால கருவிகள் கண்டுபிடிக்கப்பட்டுள்ளன. இக் கருவிகள் கண்டுபிடிக்கப்பட்டதன் வாயிலாக கடலூர் மாவட்டத்தின் தொல்லியல் சிறப்பும் பழைய காலத்தில் இருந்தே தொடங்குகிறது எனலாம்.
கண்டரக்கோட்டை
வடலூரில் இருந்து 25 கி.மீ தொலைவில் பண்ருட்டிக்கு அருகே கண்டரக்கோட்டை கிராமம் அமைந்துள்ளது. இங்குள்ள அரசியப்பன் கோயில் எதிரே சுமார் இரண்டு ஏக்கர் பரப்பளவில் கோட்டைமேடு என அழைக்கப் படும் பண்பாட்டுப் பகுதி ஒன்று உள்ளது. இப்பருதியிலிருந்து 21 செமீ நீளமும், 9 செ.மீ அகலமும், 19 செமீ சுற்றளவும் கொண்ட கைகோடரியும், 15செமீ நீளமும், 8 செமீ அகலமும், 16 செமீ சுற்றனவும் கொண்ட சிறிய வகை கைக் கோடரி ஒன்றும் கண்டறியப்பட்டுள்ளது. இக் கருவிகளின் கைப் பிடியானது கூர்மையானதாகவும், வெட்டும் பகுதி பட்டையாக செதுக்கப்பட்டு கூர்மைப் படுத்தப்பட்டுள்ளது. இந்த ஆயுதங்கள் சுமார் 9000 ஆண்டுகள் பழமையானதாகும்.
மூன்றாவது இயலில் வரலாற்றுக்காலம் என்று வரையறை செய்யப்பட்டுள்ளது. சங்ககாலம்
சங்க காலம்
சங்ககாலம் என்பதன் காலவரையறை குறித்து வேறுபட்ட கருதுகோல்கள் வரலாற்று அறிஞர்களிடையே இருப்பினும், பெரும் பான்மையான அறிஞர்கள் கி.மு.3 ஆம் நூற்றாண்டில் இருந்து கி.பி. 3 ஆம் நூற்றாண்டு வரையிலான காலகட்டத்ததையே சங்ககாலம் என்று கூறுகின்றனர். சங்ககாலத்தில் தமிழகம் இலக்கிய வளர்ச்சியில் அபார உயர்வை எட்டியது. மேலும் உலக நாடுகளுடன் ஏற்பட்ட வணிக தொடர்பியல் காரணமாக பொருளாதாரத்தில் தன்னிறைவை பெற்று பொற் காலமாகத் திகழ்ந்தது. இக்காலத்தில் புகழ் பெற்று விளங்கிய நகரங்களான மதுரை, உறையூர், கரூர், கொற்கை, அழகன் குளம், நாகைப்பட்டினம், காவிரிப்பூம்பட்டினம், அரிக்கமேடு, கொடுமணல் பொருந்தல், கீழடி போன்ற இடங்களில் கிடைத்த அகழாய்வு தரவுகளின் வாயிலாக சங்ககாலப் பண்பாட்டின் கூறுகளின் உயர்வைப் பற்றி விரிவாக அறிய முடிகிறது
சங்ககாலப் பண்பாடானது கிரேக்க, ரோம் மற்றும் எகிப்திய நாகரிகங்களுக்கு இணையானது என்பதை மறுப்பதற்கில்லை. இவ்வளவு சிறப்பு வாய்ந்த இப்பண்பாட்டின் தாக்கம் கடலூர், பண்ருட்டி குறிஞ்சிப்பாபாடி, சிதம்பரம், விருத்தாசலம் போன்ற வட்டங்களுக்கு உட்பட்ட ஊர்களான காரைக் காடு, குடிகாடு, தியாகவல்லி, அன்னப்பன் பேட்டை, ஆண்டார்முள்ளிப்பள்ளம், பெரியப்பட்டு, சிலம்பிமங்கலம் மணிக்கொல்லை, தர்மநல்லூர், வடஹரி ராஜபுரம், மருங்கூர், குருவப்பன் பேட்டை, கொண்டாரெட்டிப்பாளையம், அவியனூர், மாளிகைமேடு செங்கமேடு போன்ற ஊர்களில் நிலைபெற்று இருந்துள்ளதை கள ஆய்வு மற்றும் அகழாய்வுகள் மூலம் கண்டறியப்பட்டுள்ளன. குறிப்பாக இப்பண்பாடானது கடலூர் மாவட்டத்தில் கடற்கரையை ஒட்டிய பகுதி களில் மட்டுமன்றி மாவட்டத்தின் உட்பகுதியிலும் அதன் தாக்கம் விரவிக் காணப்படுவது குறிபிடத்தக்க ஒன்றாகும்.
இவ்வியலில் காரைக்காடு என்னும் கிராமம் வடலூரில் இருந்து 30 கிலோமீட்டர் தூரத்தில் வங்கக்கடல் அருகே அமைந்துள்ளது. இங்கு 1966ஆம் ஆண்டு மேற்கொள்ளப்பட்ட அகழாய்வின் மூலம் கிடைத்த மட்கலங்கள், மணி வகைகள், ஆய்வு செய்யப்பட்டுள்ளன.
காரைக்காடு அருகே உள்ள குடிகாடு என்ற இடத்தில் 1988இல் நடைபெற்ற அகழாய்வில் காணப்பட்ட மண் அடுக்குகள், கடலூர் மாவட்டம் விருத்தாசலத்தில் மேற்கே 24 கிலோ மீட்டர் தொலைவிலுள்ள செங்கமேடு அகழாய்வில் கிடைத்த பானை ஓடுகள், செங்கற்கள் போன்றவைகள், கடலூர் மாவட்டம் நெல்லிக்குப்பம் அருகே 1999ஆம் ஆண்டு நடைபெற்ற அகழாய்வில் அரிட்டைன் வகை மட்கலங்களின் உடைந்த பாகங்களைக் கொண்டு நடத்தப்பட்ட ஆய்வின்படி இப்பகுதி மக்கள், உரோம் நாட்டுடன் வணிகத் தொடர்பு வைத்திருந்ததை உறுதிப்படுத்துகின்றன. என்கின்றார் தொல்லியல் ஆய்வாளர்கள்.
மேலும் மருங்கூர் என்ற ஊரில் நடைபெற்ற அகழாய்வில் கண்டெடுக்கப்பட்ட முதுமக்கள் தாழியின் உட் பகுதியில் மக்கள் அ-தி(தீ)-ய-க-ன் என்று பொறிக்கப்பட்டிருக்கிறது. இவ்வாறான எழுத்துக் குறியீடுகள் ஆய்வு செய்யப்பட்டுள்ளன.
வடலூர் பகுதியில் வண்ண மணி தொழிற்சாலைகள் இருந்ததற்கான தொல்லியல் ஆவணங்கள் கிடைத்துள்ளன என்பதனை மூன்றாவது இயலில் உறுதிப்படுத்துகிறார்.
நான்காவது இயலில் பல்லவர் காலம் தொட்டு விஜயநகர நாயக்க மன்னர்களின் காலம் வரையில் உள்ள காலகட்டத்தில் இடைக்காலம் என்று வரையறை செய்கிறார். இக்காலத்தில்தான் தமிழகம் அனைத்துத் துறைகளிலும் அபார வளர்ச்சியை பெற்றிருந்தது. குறிப்பாக இலக்கியம், நிர்வாகக் கட்டமைப்பு, சிற்பக்கலை, கட்டடக்கலை, போன்றவற்றில் புதிய மறுமலர்ச்சியை பெற்றது. மக்கள் வாழ்விடங்கள் நகரம், ஊர், மங்கலம், தனியூர், பாக்கம், மணிக்கிராமம் என்று பரிணமித்தது இக்காலத்தில்தான். இடைக் காலத்தை பற்றி முழுமையாக அறிந்து கொள்வதற்கு கல்வெட்டுகள், செப்பேடுகள், இலக்கியங்கள், வெளிநாட்டினர் குறிப்புகள் போன்றவற்றின் மூலம் விரிவாக அறிய முடிகிறது. வடலூர் வரலாற்றை கட்டமைப்பதற்கு இடைக்கால சான்றுகள் பெரிதும் துணை நிற்கின்றன என்று சொல்லும் நூலாசிரியர் இப்பகுதியில் பல்லவர் காலம், சோழர் காலம், சோழர்களின் ஆட்சியில் கடலூர் மாவட்டம், சோழர்களின் ஆட்சியில் வடலூர், மற்றும் சிவன் கோயில், துர்க்கை சிலை, சிவலிங்கம் கட்டடப் பகுதிகள் போன்றவற்றை ஆய்வு செய்து வடலூரில் தொன்மையை நிறுவுகிறார்.
அதாவது பல்லவர் காலம் முதல் பாளையக்காரர்கள் காலம் வரை இப்பகுதியில் நடந்த நிகழ்வுகளைத் தொல்லியல் தரவுகளோடு, அரசுகளுக்கு இடையே நடந்த மோதல், இப்பகுதியில் வெட்டப்பட்ட ஏரிகள், குளங்கள், நன்செய் புன்செய் நிலங்கள்
பற்றிய தகவல்கள், மக்களின் வாழ்வியல் சூழல், பண்பாட்டுச் சூழல் என பலவும் விரிவாகப் பேசப்பட்டுள்ளன.
ஐந்தாவது இயலில் ஐரோப்பியர் வருகை குறித்தும் சுதந்திரப் போராட்டம் குறித்தும் இந்த மண்ணில் தோன்றிய சமூக சீர்திருத்தவாதிகள் மற்றும் கடலூர் மண்ணுக்கு வந்து சென்ற மகாத்மா காந்தியடிகள், சுதந்திர போராட்ட பெண் போராளி வீரமங்கை அஞ்சலையம்மாள், ஆஷ் துரையைக் கொல்வதற்கு புதுவையில் துப்பாக்கிப் பயிற்சி முடித்து கடலூர் திருப்பாதிரிப்புலியூர் புகைவண்டி நிலையத்திலிருந்து புறப்பட்ட வாஞ்சிநாதன் போன்ற பல பேருடைய வரலாறு இங்கே பேசப்பட்டுள்ளது.
கடலூர் மாவட்டம் சிறந்த சமூக மற்றும் சமய சீர்திருத்த வாதிகளை உலகிற்கு அளித்த பெருமைக்குரியது அப்பர், சுந்தரமூர்த்தி சுவாமிகள், திலகவதியார், ஞானியார் சுவாமிகள், வேதாந்த தேசிகர் போன்ற சமூக சமய சீர்திருத்த வாதிகள் வாழ்ந்தது இந்த மாவட்டத்தில்தான். அந்த வரிசையில் பதினெட்டாம் நூற்றாண்டில் தோன்றிய வள்ளல் இராமலிங்க அடிகளார் மிகச் சிறந்த சமூக மற்றும் சமய சீர்திருத்த வாதியாவார் என்பதோடு வடலூர் என்பதன் பழைய வரலாற்றுப் பெயர் பார்வதிபுரம் என்பதையும், முதன்முதலில் அதனை "வடலூர்" என்று வள்ளலார் பதிவு செய்ததும் மற்றும் பல்வேறு வரலாற்றுச் செய்திகளும் இவ்வியலில் பதிவுசெய்யப்பட்டு இருப்பதோடு பசும்பொன் முத்துராமலிங்க தேவர் அவர்களுக்கும் சன்மார்க்க நெறிக்கும் உள்ள நெருக்கமான தொடர்பினை மிக அருமையாக பதிவு செய்திருக்கிறார் நூலாசிரியர்.
நூலாசிரியர் ஆறாவது இயலில் சமயம் குறித்து பேசுகிறார். பண்டைய காலம் தொட்டு தற்காலம் வரையிலான சமய வரலாற்றினை இந்த இயல் விளக்குகிறது. சமணம், பௌத்தம், சைவம், வைணவம், கிருத்துவம், இஸ்லாம், போன்ற சமய நெறிகள் இந்த மண்ணில் தழைத்தோங்கி வளர்ந்ததற்கான காரணங்களை வரலாற்று தரவுகளோடும், தொல்லியல் தரவுகளோடும் விளக்குகிறார்.
தொண்டை நாடு புதுக்கோட்டை மதுரை போன்ற பகுதிகளில் சமணசமய தடயங்கள் அதிகம் இருப்பதற்கான தொல்லியல் சான்றுகளை கொடுக்கும் நூலாசிரியர் சிவராமகிருஷ்ணன் பல்வேறு சமய நிலைகள் கடலூர் மாவட்டம் வடலூரில் இருந்ததற்கான காரணங்களை கடலூர், திருப்பாதிரிப்புலியூர், குமாரப்பேட்டை, கணிசப்பாக்கம், திருவதிகை, கீழ்காவனூர், எனதிரிமங்கலம், முகாசபரூர் போன்ற பகுதிகளில் நடைபெற்ற அகழ்வாய்வில் கண்டெடுக்கப்பட்ட சிலை வடிவங்களைக் கொண்டு நிறுவுகிறார்.
ஏழாவது இயலில் நாணய சான்றுகள் விளக்கப்பட்டுள்ளன. சங்ககால நாணயம், ரோமானிய நாணயம், பல்லவர் நாணயங்கள், முதலாம் மகேந்திரவர்மன் நாணயம், இரண்டாம் நரசிம்மவர்மன் நாணயம், பெயரில்லாத பல்லவர் நாணயம், முதலாம் ராஜராஜ சோழனின் செப்புக்காசுகள், வரதராஜன்பேட்டை தங்கப்புதையல், சோழர்கால அய்யனார் கோயில் தங்கப் புதையல், கங்கர்கள் கால பொற் காசுகள், விஜயநகர நாணயங்கள் போன்றவற்றின் ஆய்வுகள் ஏழாவது இயலில் கையாளப்பட்டுள்ளன.
எட்டாவது இயல் இந்த நூலின் ஏழு இயல்களின் ஒட்டு மொத்தத் தொகுப்பாக அமைந்திருக்கிறது.
ஒன்பதாவது இயலாக பிற்சேர்க்கை என்று பதிவிட்டு இருக்கிறார். இந்தப் பிற்சேர்க்கையில் கடலூர் மாவட்டத்தில் கண்டெடுக்கப்பட்ட புதைபொருள் ஆவணங்கள் தொடர்பான ஒளிப்படங்கள் பிற்சேர்க்கையாக இணைக்கப்பட்டிருக்கிறது.இது இந்நூலுக்கான தனிச்சிறப்பாகும். இந்த நூல் அனைவரும் படிக்க வேண்டிய அருமையான நூல். நிறைந்த தொல்லியல் சான்றுகளும், வரலாற்றுச் செய்திகளும் அடங்கிய அற்புதமான நூல். நூலை எழுதிய நூலாசிரியருக்கும், நூலை வெளியிட்ட பதிப்பகத்தாருக்கும் இனிய வாழ்த்துக்கள்.
இனிய அன்புடன்
புலவர் ச.ந.இளங்குமரன், நிறுவனர், வையைத் தமிழ்ச்சங்கம், தேனி.
& ஒருங்கிணைப்பாளர், வாசிக்கலாம் வாங்க தேனி.
